2018-ci ildə Rusiyada təşkil olunacaq dünya çempionatının seçmə mərhələsi çərçivəsində Tofiq Bəhramov adına Respublika stadionunda keçirilmiş Azərbaycan – Şimali İrlandiya oyunundan hər iki komandanın baş məşqçisinin səsləndirdiyi fikirləri diqqətinizə çatdırırıq:
Robert Prosineçki (Azərbaycan millisinin baş məşqçisi): “Çox danışmaq istəmirəm. Futbolda belə hallar olur. Bir komanda oynadı, digəri qələbə qazandı. Yəqin komandadan razı qalarsınız. Uşaqlar baxımlı oyun sərgilədi. Bu gün 70 faiz top bizdə idi. Çox az səhv etdik. Yalnız son dəqiqədə səhvə yol verdik və qol buraxdıq. 4 real qol şansımız var idi. Namiqi yıxdılar, hakim təhlükəli mövqedən cərimə zərbəsi vermədi. Mən komandamdan razı qaldım”.
Maykl Onil (Şimali İrlandiya millisinin baş məşqçisi): “Çətin oyun oldu. Yaxşı komandaya qarşı çıxış etdik. Əsas qol vurmaq idi ki, bunu da bacardıq. Bəzi oyunçularımız müxtəlif səbəblərdən olmasa da, lazımi nəticəni əldə edə bildik. Qrupda lider Almaniya yığmasıdır. Bizim məqsədimiz ikinci yeri tutmaqdır. Bizim üçün hava şəraiti böyük rol oynadı. Avropa çempionatındakı heyətdən bu gün 7 nəfər yox idi. Bu üzdən bizim üçün əsas nəticə idi. Buna da nail olduq”.
