Təmsilçilərimizin potensial rəqibləri məlum olub

Çempionlar Liqasının ikinci təsnifat mərhələsində Yunanıstan çempionu “Olimpiakos”la qarşılaşacaq “Neftçi” rəqibini mübarizədən kənarlaşdıracağı təqdirdə, növbəti mərhələdə “Mura” (Sloveniya) - “Lüdoqorets” (Bolqarıstan) cütünün qalibi ilə qarşılaşacaq. Təmsilçimiz ilk oyununu evdə keçirəcək. Bu mərhələnin ilk oyunları 3-4 avqust, cavab qarşılaşmaları isə 10 avqust tarixində keçiriləcək. Təmsilçimiz “Olimpiakos”la mübarizədən məğlub ayrılacağı halda, çıxışını Avropa Liqasında davam etdirəcək. Avropa Liqasının üçüncü təsifat mərhələsində isə "Malmö" (İsveç) - HJK (Finlandiya) cütünün məğlubu ilə qarşılaşacaq. Bu mərhələnin oyunları 5-12 avqust tarixlərində oynanılacaq.

UEFA Konfrans Liqasının ikinci təsnifat mərhələsindən mübarizəyə başlayan təmsilçilərimizin də növbəti – üçüncü təsnifat mərhələsində qarşılaşacağı potensial rəqibləri məlum olub. “Qarabağ” – “Aşdod” (İsrail) cütünün qalibi AEL (Kipr) – “Vlajnia” (Albaniya) cütünün, “Çukariçki” (Serbiya) – “Sumqayıt” çütünün qalibi “Hammarbü” (İsveç) – “Maribor” (Sloveniya) cütünün, “Soçi” (Rusiya) - “Keşlə” cütünün qalibi isə “Partizan” (Serbiya) – “Dunayska Ştreda” (Slovakiya) cütünün qalibi ilə qarşılaşacaq. Təmsilçilərimiz növbəti mərhələyə vəsiqə qazanarsa, “Sumqayıt”la “Keşlə” ilk oyununu evdə, “Qarabağ” isə səfərdə keçirəcək. Konfrans Liqasının üçüncü təsnifat mərhələsinin oyunları 5-12 avqust tarixlərində keçiriləcək.