Bu gün UEFA İcraiyyə Komitəsinin iclası keçirilib. Müzakirə olunan məsələlərdən biri Azərbaycan təmsilçilərinin (milli və klub komandaları) ev oyunlarının neytral meydanda keçirilməsi ilə bağlı bu ilin oktyabrında qəbul olunmuş qərara yenidən baxılması olub. Müzakirələrdən sonra bu məsələ ilə bağlı qəbul olunmuş qərarı diqqətinizə çatdırırıq:
Azərbaycanda/Ermənistanda oyunların keçirilməsi
İki ölkə arasında atəşin dayandırılması barədə 10 noyabr 2020-ci tarixli razılaşma və bu xüsusda bütün digər məqamlar nəzərə alınaraq, hesab olunur ki, hər iki ölkədə UEFA oyunlarının keçirilməsi üçün şərtlər yerinə yetirilə bilər.
Beləliklə, UEFA İcraiyyə Komitəsi UEFA oyunlarının Azərbaycanda və Ermənistanda keçirilməsi ilə bağlı 2020-ci il oktyabrın 20-də qəbul olunmuş qadağanın ləğv olunması barədə qərar qəbul edir.