Memorandumun yenilənməsi mərasimi keçirilib (fotoreportaj)

2009-cu ildən keçirilən “Coca-Cola Məktəbli Kuboku” turiniri 2011-ci ildən Azərbaycan Futbol Federasiyaları Assosiasiyası və Coca-Cola tərəfindən Təhsil Nazirliyinin dəstəyi ilə təşkil olunur. Uğurlu 5 illik əməkdaşlığın ardından tərəflər ölkənin ən kütləvi futbol layihəsi olan “Coca-Cola Məktəbli Kuboku” turinirinin müddətinin daha 4 il artırılmasına qərar veriblər. Respublika məktəblərinin 70%-dan çoxunu əhatə edən bu layihə ölkədə ən kütləvi futbol layihəsidir.

Tədbirdə 5 illik əməkdaşlıq dövründə əldə olunmuş nəticələr və gələcək planlar haqqında məlumat verilib. AFFA-nın Marketinq və Sponsorluq Şöbəsinin müdiri Tural Piriyev xüsusi təqdimatla çıxış edərək tədbir iştirakçılarını turnir barədə məlumatlandırıb. Sonra AFFA-nın Baş katibi Elxan Məmmədov, təhsil nazirinin müavini Firudin Qurbanov və Azerbaijan Coca-Cola Bottlers şirkətinin Baş direktoru Erdinc Güzel tərəfindən memorandum imzalanıb. AFFA tərəfindən Təhsil Nazirliyi və Coca-Cola Bottlers şirkətinə göstərdikləri dəstəyə görə simvolik hədiyyələr təqdim olunub.

 

Erdinc Güzel (“Azerbaijan Coca-Cola Bottlers” şirkətinin baş direktoru): “Coca-Cola” 200-dən çox ölkədə fəaliyyət göstərir və bu ölkələrin hamısında cəmiyyətin inkişafı naminə müxtəlif proqramlara dəstək olur. “Coca-Cola Məktəbli Kuboku” da belə proqramlardan biridir. Ötən beş il ərzində “Coca-Cola Məktəbli Kuboku” turniri 1 milyondan artıq məktəblini əhatə edib və turnirin qalibləri müxtəlif beynəlxalq yarışlarda iştirak hüququ qazanıblar. Proqramın məqsədi məktəbliləri idmana cəlb etməklə onların həyatına müsbət dəyişikliklər gətirməkdir. Uşaqlar nə qədər hərəkətdə olarlarsa, bir o qədər də sağlam olarlar. İnanıram ki, növbəti illərdə də proqramın uğurları artmaqda davam edəcək. “Coca-Cola Məktəbli Kuboku”nun həyata keçirilməsində dəyərli tərəfdaşlarımız AFFA və Təhsil Nazirliyinə təşəkkür edirəm”.

 

 

Elxan Məmmədov (AFFA-nın baş katibi): “AFFA, Təhsil Nazirliyi və “Coca-Cola Bottlers” şirkəti 5 ildir ki, Məktəbli Kuboku yarışını təşkil edir. Azərbaycanda ən kütləvi yarışdır və bütün bölgələrdə keçirilir. Artıq 5 il keçdi və yeni müqavilə imzalanır.  Fürsətdən istifadə edib, Coca-Cola şirkətinə, Təhsil Nazirliyinə göstərdikləri dəstəyə görə təşəkkürümü bildirirəm. Düşünürəm ki, Azərbaycan üçün bu çox önəmli bir layihədir. İlk növbədə sağlam həyatın və ümumiyyətlə, idmanın təbliğidir. Biz bu turnir vasitəsilə uşaqlara idmanı, xüsusilə də futbolu sevdiririk. Artıq yaxşı nəticələrmiz də var: bu layihədə iştirak edən Ülvi İbrahimov məktəbi bitirdikdən sonra “Qarabağ” futbol klubu ilə peşəkar müqavilə imzalayıb. Bu, müsbət haldır. Arzulayıram ki, “Coca-Cola Məktəbli Kuboku” turnirində iştirak edən istedadlı şagirdlər gələcəkdə karyeralarını futbolçu kimi davam etdirsinlər. Onu da qeyd edim ki, növbəti 4 il ərzində biz turnir üçün qeydiyyat sistemini tətbiq edəcəyik. Bütün bölgələrədən gələn iki yüz mindən çox şagirdi qeydiyyatdan keçirəcəyik”.