az en
Əsasnamə Təqvim Cədvəl Bombardir
2018/2019-cu il mövsümü üçün Azərbaycan Futbol Federasiyaları Assosiasiyası (AFFA) tərəfindən 13 yaşadək (U-13) qız futbolçulardan ibarət komandalar arasında keçirilən Azərbaycan çempionatının
 
Əsasnaməsi
 
  1. Əsas müddəalar
 
  1. Bu qaydalar liqada iştirak edən komandaların və təşkilinə cəlb olunmuş digər üzvlərin hüquqlarını, vəzifələrini və məsuliyyətini müəyyən edir.
 
 
2. Məqsəd və vəzifələr
 
  1.  U-13 Qızlar Liqası aşağıdakı məqsədlər üçün keçirilir:
  • Uşaq və yeniyetmələr (qızlar) arasında futbolun təbliği və kütləviliyi;
  • Uşaq və yeniyetmə qız futbolçuların ustalığının yüksəldilməsi;
  • Uşaq və yeniyetmə qız futbolçuların klublarda hazırlanması və yığma komandalara cəlb olunması;
  • Komandaların mövsümün yekununda tutduğu yerin müəyyən edilməsi.
 
 
  1. İştirakçıların müəyyən olunması
 
3.1 U-13 Qızlar Liqasında klublara və komandalara iştirak hüququnu AFFA verir.                            
3.2 U-13 Qızlar Liqasında bir klub bir ad altında, bir komanda ilə təmsil oluna bilər.
 
 
4. Futbolçuların təvəllüdləri və liqalardakı iştirakı
 
  1. Liqada 01.01.2005–31.12.2007 təvəllüdlü olan oyunçular iştirak edə bilər. Əlavə olaraq, 2008, 2009-cu il təvəllüdlü cəmi 4 oyunçu qeydiyyata alına, lakin onlardan yalnız ikisi meydanda oynaya bilər.
  2.  Futbolçunun müəyyən liqada aldığı cəza digər liqaya şamil olunmur.
 
5. Transfer, icarə və sifariş məsələləri
 
5.1 Hər bir futbolçu eyni zamanda yalnız bir klubda qeydiyyatda ola bilər.
5.2 Bəzi fərdi münaqişələrə AFFA-nın Futbolçuların Statusu və Transferlər Komitəsi tərəfindən baxılacaqdır.
5.3 Hər futbolçu mövsüm ərzində ən çox iki klubda çıxış edə bilər.
5.4 Futbolçuların mövsüm ərzində əlavə sifarişi və transferləri aşağıda göstərilən qaydalar üzrə həyata keçirilməlidir:
a) Klubun əlavə sifariş etmək hüququna məhdudiyyət yoxdur.
b) Dövrələrarası fasilədə əlavə sifarişlərin sayına məhdudiyyət yoxdur. Sifarişlərin müddəti Qadınlar Liqasının təşkili şöbəsi tərəfindən əvvəlcədən rəsmi elan olunur.
5.5 Bütün təqdim olunan sənədlərə görə klub və baş məşqçi məsuliyyət daşıyır.
 
 
6. Klub və ya komanda tərəfindən təqdim olunmuş futbolçuların saxta sənədləri
 
6.1 Mövsüm ərzində aşağıda göstərilən hallar sənədlərin saxtalaşdırılması kimi qəbul olunur:
a) Sifariş zamanı təqdim olunan saxta sənədlər:
  • Doğum haqqında şəhadətnamə
  • Şəxsiyyət vəsiqəsi
  • Ümumvətəndaş pasportu
  • Tibbi arayış
  • Elektron formatda təqdim olunan (3x4) fotoşəkil
  • Müqavilə və s.
b) Bir futbolçunun digər futbolçuya məxsus olan lisenziya ilə oyundan öncə, oyun zamanı, fasilədə oyuna buraxılma cəhdi və ya iştirakı;
c) Lisenziyasız futbolçunu oyundan öncə, oyun zamanı, fasilədə oyuna buraxılma cəhdi və ya iştirakı;
ç) Oyundan öncə AFFA tərəfindən tərtib olunmayan lisenziyanın hakimə təqdim olunması və s.
Qeyd: Saxtakarlıq edən klub və ya komanda həmin tur üçün nəzərdə tutulan yol xərcinin 100% miqdarında AFFA nümayəndəsi tərəfindən cəzalandırılır.
 
6.2 Yuxarıda göstərilən hallar aşkarlanarsa, bu cəzalar İntizam Komitəsi tərəfindən tətbiq oluna bilər:
a) Futbolçunun iştirak etdiyi bütün oyunların nəticələrinin ləğvi (texniki məğlubiyyət);
b) Futbolçunun lisenziyasının ləğvi;
c) Məşqçinin yarışda iştirak etmək üçün verilən lisenziyasının 12 aylıq ləğvi;
ç) Məşqçinin məşqçilik lisenziyasının (Pro, A, B, C) ləğvi;
d) Kluba və ya təmsil etdiyi quruma xəbərdarlıq məktubunun göndərilməsi;
e) Məşqçinin futbolla bağlı fəaliyyətdən 12 aylıq uzaqlaşdırılması və s.
 
 
  1. İştirakçı komandanın öhdəlikləri
 
7.1 İştirakçı klub və ya komandalar bu Əsasnamənin bütün bəndinə riayət etməlidirlər.
7.2  İştirakçı klub və ya komandalar FİFA tərəfindən tərtib olunmuş Fair Play prinsiplərinə riayət etməlidirlər.
7.3   Klub və komandalar onları təmsil edən hər hansı bir şəxsin (futbolçular, rəsmi şəxslər, azarkeşlər və s.) davranışına görə məsuliyyət daşıyırlar.
7.4 Ev sahibi komanda oyunu topla təhciz etməlidir.
7.5 U-13 Qızlar Liqasında iştirak edən klub və ya komandalar ölkə xaricinə təlim-məşq toplanışına və ya beynəlxalq turnirlərə gedərsə və bu səfər Liqa təqvimi ilə üst-üstə düşərsə, klub 20 gün əvvəl AFFA-ya yazılı məlumat verməlidir. Klubun təlim-məşq toplanışı ilə U-13 Qızlar Liqasının təqvim oyunları üst-üstə düşdüyü halda, oyunların təxirə salınıb-salınmaması ilə bağlı son qərarı AFFA verir.
 
Oyun forması ilə bağlı qaydalar:
 
7.6  U-13 Qızlar Liqasının komandalarının formalarının üzərində həmin Liqanın şevronu əks oluna bilər.
7.7 U-13 Qızlar Liqasında iştirak edən yeni komandaların idman geyimləri AFFA tərəfindən verilir. Forma seçimində üstünlük ev sahibi komandaya verilir.
7.8 Qarşılaşan komandaların forma rəngləri eyni olduqda, protokolda nominal qonaq qismində qeyd olunmuş komanda AFFA tərəfindən təqdim olunmuş oyun gödəkçələrini geyinir.
7.9 Futbolçunun oyun formasının kürəyində nömrəsi olmalıdır. Nömrə formadan tam seçilməlidir. Futbol corablarının altında qoruyucular (şitki) olmalıdır.
Qeyd: Futbolçunun oyun formasının kürəyində nömrəsi olmadığı təqdirdə komanda və ya klub ilk halda nəzərdə tutulan yol xərcinin 50% miqdarında cəzalandırılır. Bu hal təkrarlanacağı təqdirdə pul cəzası 100% miqdarına çatdırılır.
7.10 İştirakçı klub və ya komanda sponsorun loqosunu futbol maykasının üzərində əks etdirmək istədikdə bu haqda öncədən Qadınlar Liqasının təşkili şöbəsinə məlumat verməlidir.
 
 
 
  1. Yarışın keçirilmə sistemi
 
8.1 Yarışlar iki (2) seçmə mərhələ və final mərhələsindən ibarətdir.
 
I seçmə mərhələ
 
  1.   Birinci seçmə mərhələ iki dövrədən ibarət olacaqdır. U-13 Qızlar liqası bu sezon 4 regiondan – Paytaxt region, Qərb zonası, Mərkəz zonası, Şimal-Qərb zonasından ibarətdir. Paytaxt regionu A və B zonası olmaqla iki yerə bölünmüşdür. A zonasında 7 komanda, B zonasında isə 8 komanda öz aralarında iki dövrədən ibarət olmaqla yarışacaqlar. A və B zonasının ilk iki yeri tutan komandaları (Paytaxt regionundan toplam 4 komanda) final mərhələsinə birbaşa vəsiqə qazanacaqdır. Qərb və Mərkəz zonasından ilk iki yeri tutan komandalar play-off mərhələsində Zaqatala regionundan çıxan 4 komanda ilə qarşılaşacaqdır. Play-off mərhələsinin 4 qalib komandası Paytaxt regionunun 4 komandası ilə final mərhələsində qarşılaşacaq.
  2. Komandaların birinci dövrədə topladığı xallar növbəti dövrədə qüvvədə qalır.
  3. U-13 Qızlar Liqasında hər bölgə üzrə iştirak edəcək komandaların sayı, oyunların təşkili üçün seçilmiş mərkəz şəhərlər və oyunların keçirilmə sistemi aşağıda göstərilmişdir:
 
 
 
 
 
 
Region
 
 
 
 
Keçirilmə yeri
 
I seçmə mərhələ
 
 
Birbaşa Final mərhələsinə çıxan komandalar
 
 
II seçmə
mərhələsinə (play-off) çıxan
komandaların sayı
 
 
Final mərhələsinə çıxan komandaların sayı
 
1-ci dövrədəki iştirakçıların sayı
 
2-ci
dövrədəki
iştirakçıların sayı
 
Paytaxt regionu
Bakı
(Zona - A)
7
7
2
-
 
4
Bakı
(Zona - B)
8
8
2
-
Qərb zonası
Göygöl
8
8
-
2
4
Mərkəz zonası
Kürdəmir
7
7
-
2
Şimal-Qərb zonası
Zaqatala
8
8
-
4
 
 
8.5 Təqvimlər Qadınlar Liqasının təşkili şöbəsi tərəfindən tərtib olunur.
8.6 Birinci və ikinci dövrələrdə qaliblərin müəyyən olunması:
  1. Komandaların turnir cədvəlində tutduğu yerlər toplanmış xallara görə müəyyən olunur.
  2. Qələbəyə görə 3 (üç) xal, heç-heçəyə görə 1 (bir) xal verilir. Məğlubiyyətə görə isə xal verilmir.
  3. Komandaların xalları bərabər olarsa, turnir cədvəlindəki sıralama aşağıdakı göstəricilərə görə müəyyən olunur:
  • Komandaların öz aralarında keçirdikləri oyunların xallarına əsasən;
  • Komandaların öz aralarında keçirdikləri oyunlarda vurulmuş və buraxılmış qolların sayına əsasən;
  • Bütün oyunlarda vurulmuş və buraxılmış topların fərqinə görə;
  • Bütün oyunlarda vurulmuş qolların sayına əsasən;
  • Komandaların qələbə saylarına əsasən;
  • Ən az qırmızı və sarı vərəqələrə görə toplamış xalların fərqinə əsasən (sarı vərəqə 1 xal, qırmızı vərəqə 3 xal);
8.7 Bölgələr üzrə final mərhələyə aşağıda göstərilmiş qaydaya uyğun olaraq 8 komanda vəsiqə qazanır:
Birbaşa final mərhələsinə vəsiqə qazanan komandalar:
Yuxarıdakı cədvəldə birbaşa final mərhələsinə vəsiqə qazanan komandaların sayı göstərilib.
II seçmə mərhələ vasitəsi ilə final mərhələsinə vəsiqə qazanan komandalar və keçirilmə şərtləri
II seçmə mərhələ oyunları play-off sistemi ilə keçirilir.
I seçmə mərhələdə toplanan xallar II seçmə mərhələdə nəzərə alınmır.
II seçmə mərhələdə ev, səfər sistemi tətbiq olunmayacaqdır. Hər bir komanda bir oyun oynayacaq və oyunlar neytral zonada keçiriləcəkdir.
Regionlar üzrə II və III yer tutan komandalar çarpaz olaraq qarşılaşırlar və qalib gələn komandalar isə həmin regionlar üzrə birinci yer tutan komandalarla püşkatma yolu ilə qarşılaşırlar. Qalib gələn komandalar final mərhələsinə vəsiqə qazanacaqlar.
 
 
Final mərhələsi
 
  1.   Final mərhələsi 8 komandanın iştirakı ilə olimpiya sistemi ilə keçirilir.
  2.   Final mərhələsi 1/4, 1/2 mərhələlərindən, III yer uğrunda oyun və final oyunundan ibarətdir.
  3. 1/2 final mərhələsində məğlub olan komandalar üçüncü yer uğrunda, qaliblər isə çempionluq uğrunda mübarizə aparır.
  4. Final mərhələsinin 1/4 final cütlükləri püşkatma yolu ilə müəyyən olunur.
  5. Final mərhələsində oyunlar play-off sistemi ilə keçirilir (ev, səfər). İki oyunun nəticəsinə əsasən qalib müəyyənləşməzsə, hər hissəsi 10 dəqiqədən ibarət əlavə iki hissə oynanılır. Əlavə vaxtda qalib müəyyənləşməzsə, qalib penaltilər seriyasında müəyyənləşir. Hər komanda ilkin olaraq 5 zərbə vurmaq hüququna malikdir. Əgər 5 zərbədən sonra qalib müəyyənləşməzsə, penalti zərbələri qalib müəyyənləşənə qədər davam etdirilir.
 
 
  1. Meydança
 
9.1 Oyunlar AFFA tərəfindən təsdiq edilmiş meydançalarda keçirilir.
9.2 Meydançanın uzunluğu (60-65 m.), eni (45-50 m.).
9.3 Meydançada iki qapı olmalıdır.
9.4 Penalti nöqtəsindən qapı xəttinə olan məsafə 9 m.
9.5 Cərimə meydançası qapı xəttindən 13 m. məsafədə olan paralel olmalıdır.
 
 
Meydançanın sxemi:
 
 
 
  1. Oyunun təşkili
 
10.1 U-13 Qızlar Liqasının oyunları həftənin şənbə günü keçirilir. İstisna hal kimi digər günlər Qadınlar Liqasının təşkili şöbəsi tərəfindən təyin oluna bilər.
10.2 Qadınlar Liqasının təşkili şöbəsi hər turdan öncə oyunların vaxtı ilə əlaqədar regional nümayəndəliyə və yaxud komandadakı əlaqələndirici şəxsə məlumat verir.
10.3 Komandalar oyunun başlamasına ən azı 30 dəqiqə qalmış oyun keçirilən meydana gəlməlidirlər. Oyunun başlanmasına 15 dəqiqə qalmış oyunun protokoluna nömrələri göstərilməklə futbolçuların adları və soyadları yazılmalı, futbolçuların lisenziyaları hakimə təqdim edilməlidir. Oyundan əvvəl lisenziyalar oyunun hakiminə təqdim edilmədiyi halda hakim oyunu başlamamalıdır.
10.4 Oyun başlayan vaxta klub və ya komanda meydanda olmazsa aldığı yol xərcinin 50% miqdarında cəzalandırılır. Təyin olunan vaxtdan sonrakı 20 dəqiqə ərzində komanda meydanda olmadığı təqdirdə pul cəzası 100%-ə çatdırılır və oyunun protokolu bağlanılır.
10.5 U-13 Qızlar Liqasında bütün komandalar AFFA tərəfindən nəqliyyat xərcləri ilə təmin olunur (Peşəkar futbol komandalar istisna olmaq şərti ilə)
10.6 U-13 Qızlar Liqasında mərkəzləşdirilmiş yerlərdə keçirilən oyunların stadionunun icarə haqqı AFFA tərəfindən ödənilir.
  1. Təqvimə uyğun olaraq adı birinci yerdə olan komanda ev sahibi hesab edilir.
 
 
  1. Oyun qaydaları
 
11.1  Bütün oyunlar FİFA oyun qaydalarına əsasən keçirilir.  
11.2 Oyunlar iki hissədən ibarətdir. Hər hissə 25 dəqiqə, hissələrarası fasilə isə 5 dəqiqədir.
11.3 Oyunlarda əvəzetmə oyunun protokolunda adları göstərilmiş futbolçularla həyata keçirilir. Əvvəlcə protokolu ev sahibi olan komanda doldurur. Oyunun protokoluna 15 futbolçunun (8 əsas, 7 ehtiyat) adı və soyadı yazılır.
11.4 Yalnız rəsmi heyətdən 3 nəfər və 7 futbolçunun ehtiyat skamyalarında oturmalarına icazə verilir.
11.5 Top qapı xəttindən kənara çıxarsa top meydana ayaq ilə daxil olunmalıdır (top oyuna qapıdan əllə deyil, ayaq ilə daxil olunur)
11.6 Texniki zonada siqaret çəkmək qadağandır.  
 
 
  1. Oyun zamanı futbolçuların əvəzlənməsi
 
12.1 Oyun ərzində hər komandada limitsiz və təkrar əvəzetmə mümkündür.
12.2 Meydana daxil olmağa hazırlaşan futbolçu hakimə lisenziya ilə yaxınlaşmalıdır.
12.3 Oyun ərzində ehtiyat futbolçular isinmə hərəkətlərini etmək üçün texniki zonanı tərk edə bilər. Oyunun hakimi oyundan öncə isinmə hərəkətləri üçün təyin olunmuş yerləri komandalara göstərir. İsinmə hərəkətlərini 3 futbolçu eyni zamanda edə bilər.               
                                                                     
 
  1. Oyunun protokolu
 
13.1  Oyundan öncə hər komanda oyunun protokolunu doldurmalıdır.
13.2 Protokolda  futbolçunun  adı, soyadı, təvəllüdü və formasında əks olunmuş nömrəsi göstərilməlidir. Həmçinin oyun zamanı ehtiyat skamyada oturan rəsmi şəxslərin adı, soyadı və vəzifəsi yazılmalıdır. Oyun protokolu hər iki komandanın rəsmi şəxsləri tərəfindən imzalanmalıdır.
13.3 İlk 8-lik kimi protokolda göstərilən futbolçular oyuna başlayır. Digər 7 futbolçu ehtiyat skamyasında əyləşir. Futbolçuların futbol formalarında göstərilən nömrələr, protokoldakı nömrələrlə uyğun gəlməlidir.
13.4  Komandalar oyundan ən azı 15 dəqiqə öncə protokolu baş hakimə təqdim etməlidirlər.
13.5  Hakimlər briqadası oyundan öncə protokolda göstərilən bütün şəxslərin lisenziyasını yoxlayır. Yarışda iştirak edən komandanın hər bir üzvü AFFA tərəfindən tərtib olunmuş lisenziyaya malik olmalıdır. Lisenziyada aşağıdakılar əks olunur:
  • Lisenziyanın nömrəsi
  • Komandanın adı
  • Şəxsin adı, soyadı,atasının adı
  • Fotoşəkil
  • Təvəllüdü
13.6 Əgər oyunun protokolu tələb olunan vaxtda hakimlərə təqdim olunmazsa, bu məsələyə AFFA-nın İntizam Komitəsi tərəfindən baxılacaqdır.
13.7  Yalnız ehtiyat futbolçu kimi göstərilən 7 nəfər oyun zamanı meydana daxil ola bilər.
13.8   Oyunun baş tutması üçün komandalar meydanda tam heyətlə olmalıdırlar. Əks halda oyun baş tutmamış sayılır, komanda üçün nəzərdə tutulan yol xərcinin 100% miqdarında cəzalındırılır  və oyunun protokolu bağlanılır.
 
  1. Oyun protokolunda futbolçu adlarının yer dəyişməsi
 
14.1 Hər iki komanda tərəfindən imzalanmış oyun protokolu hakimə təqdim olunduqdan sonra futbolçuların adlarının protokolda dəyişilməsi qadağandır. İstisna hallar aşağıdakılardır:
  • Əgər ilk 8-likdə göstərilən hər hansı futbolçunun oyundan öncə fiziki durumu ilə bağlı problem aşkarlanarsa, o zaman 7 ehtiyat futbolçudan biri ilk 8-liyə daxil ola bilər. Bu halda oyun ərzində komandanın 7 əvəzetmə ehtiyatı öncədən göstərildiyi kimi qüvvədə qalır.
  • Əgər oyun protokolunda göstərilən 7 ehtiyat futbolçudan hər hansı birinin fiziki durumu ilə bağlı problem aşkarlanarsa, o zaman protokolda göstərilməyən, lakin lisenziyası olan digər bir futbolçu ilə əvəzlənə bilər.
 
 
  1. Oyunlarda iştirakdan imtina və oyunların dayandırılması
 
15.1 Əgər komanda oyunda iştirak etməkdən imtina edərsə AFFA-nın İntizam Komitəsi tərəfindən texniki məğlubiyyət verilir. Bu hal 3 dəfə təkrarlanarsa komanda İntizam Komitəsinin qərarına əsasən turnirdən kənarlaşdırılır.
15.2 Səbəbindən asılı olmayaraq (yaş limitinin pozulması; yetər say olmadığı halda; oyuna gəlmədiyi halda və s.) çempionat ərzində 3 texniki məğlubiyyət alan komanda avtomatik turnirdən kənarlaşdırılır.
15.3 Liqadan hər hansı bir səbəbə görə kənarlaşdırılan komanda növbəti mövsüm liqaya buraxılmır.
15.4 Əgər oyun başlandıqdan sonra hər hansı bir səbəbə görə dayandırılarsa, Qadınlar Liqasının təşkili şöbəsi klub və ya komandalarla razılaşdırdıqdan sonra oyunu başqa tarixə keçirə bilər. Oyun dayandırıldığı vaxtdan və həmin ana qədər olan nəticə ilə davam etdiriləcəkdir.
 
16. Hakimlik və İnspeksiya
 
16.1 U-13 Qızlar Liqasının oyunlarını AFFA-nın Hakimlər və Hakim-İnspektorlar Komitəsi tərəfindən təyin edilmiş hakimlər idarə edir və hakimlik FİFA qaydaları əsasında həyata keçirilir. Hakimlər və Hakim-İnspektorlar Komitəsi U-13 Qızlar Liqasının oyunlarına 1 nəfərdən ibarət hakim təyin edir.
16.2 Hakim oyunun başlanmasından 60 dəqiqə öncə gəlib, meydançanın oyuna hazırlıq vəziyyətini yoxlamalıdır.
16.3 Protokollar oyundan sonra 30 dəqiqə ərzində tərtib edilməli və 24 saat ərzində AFFA-ya təqdim olunmalıdır.
16.4 Baş hakim oyunun protokoluna adı daxil edilmiş futbolçuların sənədlərini mütləq yoxlamalıdır. Oyuna sifariş edilmiş futbolçuların və iştirakçıların lisenziyaları zərurət olduqda oyunun sonunadək baş hakimdə qala bilər.
16.5 Komandalar tərəfindən hakimlərin dəyişdirilməsi ilə əlaqədar xahiş qəbul olunmur.
 
17. AFFA intizam qərarları
 
17.1 Bütün qırmızı vərəqələrə İntizam Komitəsi tərəfindən baxılır. Futbolçular İntizam Komitəsinin qərarları əsasında cəzalandırılır. Oyun zamanı və oyundan sonra baş verən insidentlərlə bağlı bütün qərarları İntizam Komitəsi qəbul edir.
 
Sarı və qırmızı vərəqələr
 
17.2 Sarı və qırmızı vərəqələrə görə məsuliyyəti komanda və ya klub daşıyır.
17.3 Qırmızı vərəqə alan futbolçu İntizam Komitəsinin çıxaracağı qərara uyğun olaraq, komandanın keçirəcəyi müəyyən olunmuş sayda növbəti oyunu (oyunları) buraxır.
17.4  Sarı vərəqələr mərhələdən asılı olmayaraq öz qüvvəsində qalır.
17.5 Cari mövsüm ərzində mərhələdən asılı olmayaraq dörd sarı vərəqə alan futbolçu növbəti turu buraxmalıdır.
17.6 Liqanın hər hansı mərhələsində alınmış qırmızı vərəqələr öz qüvvəsində qalır.
17.7 Baş tutmayan oyundan sonra İntizam Komitəsi tərəfindən texniki məğlubiyyət alan komandanın həmin oyunu buraxmalı olan futbolçuların cəzaları qüvvədə qalır.
17.8 Baş tutmayan oyundan sonra İntizam Komitəsi tərəfindən texniki qələbə alan komandanın həmin oyunu buraxmalı olan futbolçuları cəza çəkmiş hesab olunur.
17.9 Oyunçu qırmızı vərəqə alıbsa və İntizam Komitəsi növbəti oyuna qədər bu barədə qərar çıxarmayıbsa, həmin oyunçu qərar çıxana qədər oyunları buraxmalıdır.
17.10 Alınan bütün sarı və qırmızı vərəqələrə görə öhdəlik klubun üzərinə düşür (turu buraxmalı olan oyunçu oyunda iştirak edərsə məsuliyyəti komanda daşıyır).
 
 
18. Protestlər
 
18.1 Protest verən baş məşqçi oyundan dərhal sonra bu barədə baş hakimi xəbərdar etməlidir. Protestin verilməsi oyunun protokolunda öz əksini tapmalıdır. Oyunun gedişində ciddi münaqişələr baş verərsə, oyunun baş hakimi AFFA-nın Qadınlar Liqasının təşkili şöbəsinə öz izahatlarını göndərməlidirlər. Protest komandanın baş məşqçisi tərəfindən imzalanmalı, 24 saat ərzində AFFA-nın Qadınlar Liqasının təşkili şöbəsinə çatdırılmalıdır.  
18.2 Protestlərə aşağıdakı hallarda baxılmır:
  • 11 metrlik cərimə zərbələrinin təyin olunması
  • 11 metrlik cərimə zərbələrinin təyin olunmaması
  • Oyundankənar (off-side)  vəziyyətin müəyyən edilməsi barədə
  • Topun qapı xəttini keçib-keçməməsi barədə
18.3 İntizam Komitəsinin qərarı ilə razılaşmayan komanda 3 gündən gec olmayaraq apellyasiyaya müraciət edə bilər.
 
                                                                       19. Mükafatlandırma
 
Final mərhələsi
19.1 Liqada ilk 3 yeri tutan komandaların futbolçuları və baş məşqçiləri müvafiq olaraq qızıl, gümüş və bürünc medallarla və AFFA-nın diplomları ilə təltif olunur.
19.2 Mövsümün sonunda liqanın bombardiri və ən yaxşı futbolçusu seçilir və mükafatlandırılır.
 
 
20. Mətbuat
 
20.1 Oyundan sonra müraciət olunduqda hər hansı futbolçu, məşqçi və klub rəsmisindən AFFA-nın mətbuat nümayəndələri müsahibə almaq hüququna malikdirlər.
 
 
21. Stadion və iştirakçı komandaların təminatı
 
21.1 Mövsüm ərzində AFFA tərəfindən stadionlar aşağıdakı bəndlər üzrə təmin olunur:
  1. Top №4 (təsdiq edilmiş sayda)
  2. Qapılar 4 ədəd
  3. Qapı toru
  4. Oyun gödəkçələri (jilet)
  5. İcarə haqqı
 
21.2 Mövsüm ərzində AFFA tərəfindən müəyyən olunmuş komandalar aşağıdakı bəndlər üzrə təmin olunur:
  1. Top №4 (təsdiq edilmiş sayda)
  2. Nəqliyyat xərcləri (təsdiq edilmiş miqdarda)
 
 
22. Reklam lövhələri və aksiyaları (promotion)
 
22.1  Meydançada reklam lövhələri yerləşdirilməlidir.
 
 
Baş Sponsor 
Proyekt Partnyorları