Azərbaycanın futzal üzrə UEFA Çempionlar Liqasındakı təmsilçisi “Araz-Naxçıvan” bu gün ilkin mərhələdə üçüncü oyununa çıxıb. F qrupunda yer alan ölkə çempionu sonuncu matçında Avstriyanın “Ljuti Krajişniçi” kollektivi ilə qarşılaşıb.
Avstriyanın Linz şəhərində yerləşən NMS İdman Sarayında keçirilən görüş Azərbaycan çempionunun 12:3 hesablı qələbəsi ilə yekunlaşıb. “Araz-Naxçıvan”ın heyətində qolları Jean Perruzo (7:23), Alleks Rezende (10:13, 29:39), Filipe Avila (10:50, 20:34, 30:43 (pen.), 31:44), Ülvi Əliyev (23:15), Luicci Lonqo (24:24), Covanni Valerio (30:30) və Qüdrət Qasımzadə (35:14) vurublar. Təmsilçimizin bir qolu isə avtoqol kimi qeydə alınıb.
İlk iki turda “Sparta Belfast” (Şimali İrlandiya – 9:1) və “PYF Saltires”i (Şotlandiya – 7:2) məğlub edən təmsilçimiz 9 xalla birinci yeri tutub və əsas mərhələyə vəsiqə qazanıb. Əsas mərhələnin oyunları oktyabrın 26-dan noyabrın 2-dək baş tutacaq. “Araz-Naxçıvan” 7-ci qrupda “Yunayted Qalati” (Rumıniya), “Differdanj” (Lüksemburq) və “Tigers Roermand”la (Niderland) qarşılaşacaq.
