1.1 Bu qaydalar liqada iştirak edən komandaların və təşkilinə cəlb olunmuş digər üzvlərin hüquqlarını, vəzifələrini və məsuliyyətini müəyyən edir.

 

2.1 AFFA U-14 Liqası aşağıdakı məqsədlər üçün keçirilir:
• Oğlanlar arasında futbolun təbliği və kütləviliyi;
• Oğlan oyunçuların ustalığının yüksəldilməsi;
• Oğlan oyunçuların klublarda hazırlanması və milli komandalara cəlb olunması;
• Komandaların mövsümün yekununda tutduğu yerin müəyyən edilməsi;

 

3.1 U-14 Liqasında klublara və komandalara iştirak hüququnu AFFA verir.
3.2 AFFA U-14 Liqasında cari mövsümdə Misli Premyer Liqasında iştirak edən klubların müvafiq yaş qruplarının iştirakı mütləqdir.
3.3 AFFA U-14 Liqasında bir klub bir ad altında, bir komanda ilə təmsil oluna bilər.

 

4.1 İştirakçı klub və ya komandalar bu Əsasnamənin bütün bəndlərinə riayət etməlidirlər.
4.2 İştirakçı klub və ya komandalar FİFA tərəfindən tərtib olunmuş Fair Play prinsiplərinə riayət etməlidirlər.
4.3 Klublar və komandalar onları təmsil edən hər hansı bir şəxsin (oyunçular, rəsmi şəxslər, azarkeşlər və valideynlər s.) davranışına görə məsuliyyət daşıyırlar.
4.4 AFFA U-14 Liqasında iştirak edən komandalar ölkə xaricinə təlim-məşq toplanışına və ya beynəlxalq turnirlərə gedərsə və bu səfər Liqa təqvimi ilə üst-üstə düşərsə, klub 20 gün əvvəl  AFFA-nın Liqaların Təşkili şöbəsinə yazılı məlumat verməlidir. Klubun təlim-məşq toplanışı ilə AFFA U-14 Liqasının təqvim oyunları üst-üstə düşdüyü halda, oyunların təxirə salınıb-salınmaması ilə bağlı son qərarı AFFA verir.
4.5 İştirakçı klub və komandalar oyunçuların lizensiyalarını rəngli formatda çap edib özləri ilə oyuna gətirməlidir.

 

5.1 Hər bir oyunçu eyni zamanda yalnız bir klubda qeydiyyatda ola bilər.
5.2 Cari mövsüm ərzində heç bir komandaya cəlb edilməyən oyunçu istənilən zaman digər komandaya cəlb oluna bilər. 05.01.2026-cı il tarixindən – 31.01.2026-cı il tarixinədək qış transfer pəncərəsi açıq elan edilir (Yalnız “Transfer pəncərəsi” dövründə müqaviləyə xitam verilə bilər. “Transfer pəncərəsi” başa çatdıqdan sonra müqaviləsinə xitam verilmiş oyunçular digər komandaya keçid edə bilməzlər).
5.3 Cari mövsüm ərzində “Transfer pəncərəsi” başa çatdıqdan sonra adı oyun protokulunda qeyd edilməyən, həmçinin adı oyun protokolunda qeyd edilən, lakin heç bir oyunda iştirak etməyən oyunçu  digər komandaya cəlb oluna bilər.
5.4 Oyunçuların Statusu və Transferi haqqında Əsasnaməyə əsasən Oyunçuların statusu və transferi ilə əlaqədar yaranan mübahisələrə AFFA-nın Oyunçuların Statusu və Transferi Komitəsində baxılır.
5.5 Bütün təqdim olunan sənədlərə görə klub və baş məşqçi məsuliyyət daşıyır.

 

6.1 Qarşılaşan komandaların forma rəngləri eyni olduqda, protokolda nominal qonaq qismində qeyd olunmuş komanda AFFA tərəfindən təqdim olunmuş oyun gödəkçələrini geyinir.
6.2 Oyunçunun oyun formasının kürəyində nömrəsi olmalıdır. Nömrə formadan tam seçilməlidir. Futbol corablarının altında qoruyucular (şitki) olmalıdır.
6.3 İştirakçı klub və ya komanda sponsorun loqosunu futbol maykasının üzərində əks etdirmək istədikdə bu haqda öncədən LTŞ-yə məlumat verməlidir.

 

7.1 AFFA-nın rəsmi internet səhifəsində (www.affa.az) ”Futbola Qoşul” onlayn qeydiyyat sistemində oyunçu və digər iştirakçıların qeydiyyat qaydaları təqdim edilib.
7.2 Qeydiyyat qaydalarında tələb olunan sənədlərə bilərəkdən həqiqi olmayan məlumatı vermək məqsədilə edilən dəyişikliklər sənəd saxtalaşdırılması kimi qəbul edilir və müvafiq olaraq məsuliyyət yaradır.
Qeyd: Saxtakarlıq edən klub və ya komanda həmin tur üçün nəzərdə tutulan yol xərcinin 100% miqdarında AFFA nümayəndəsi tərəfindən cəzalandırılır.
7.3 Yuxarıda göstərilən hallar aşkarlanarsa, bu cəzalar AFFA-nın İntizam Komitəsi tərəfindən tətbiq oluna bilər:
a) Oyunçunun iştirak etdiyi bütün oyunların nəticələrinin ləğvi (texniki məğlubiyyət);
b) Oyunçunun lisenziyasının ləğvi;
c) Məşqçinin yarışda iştirak etmək üçün verilən lisenziyasının 12 aylıq ləğvi ;
d) Məşqçinin məşqçilik lisenziyasının (Pro, A, B, C) ləğvi;
e) Kluba və ya təmsil etdiyi quruma xəbərdarlıq məktubunun göndərilməsi;
f) Məşqçinin futbolla bağlı fəaliyyətdən 12 aylıq uzaqlaşdırılması;
g) Müvafiq digər cəza tədbirləri;

 

8.1 Yarışlar 3 (üç) - mərhələ və final mərhələsindən ibarətdir.

I mərhələ

I mərhələdəki oyunlar regionlardakı komandaların sayına əsasən pley-off və ya dairəvi sistemlə keçiriləcəkdir. Qaliblər II seçmə mərhələdə iştirak edəcəklər.

Sumqayıt zonasında I mərhələdə 9 komanda 1 dövrədən ibarət dairəvi sistemlə,
Siyəzən zonasında I mərhələdə 9 komanda 1 dövrədən ibarət dairəvi sistemlə,
Biləsuvar zonasında I mərhələdə 3 komanda 1 dövrədən ibarət dairəvi sistemlə,
Lənkəran zonasında I mərhələdə 4 komanda 1 dövrədən ibarət dairəvi sistemlə,
Ağsu zonasında I mərhələdə 6 komanda 1 dövrədən ibarət dairəvi sistemlə,
Saatlı zonasında I mərhələdə 5 komanda 1 dövrədən ibarət dairəvi sistemlə,
Ağcabədi zonasında I mərhələdə 5 komanda 1 dövrədən ibarət dairəvi sistemlə,
Zaqatala zonasında I mərhələdə 7 komanda 1 dövrədən ibarət dairəvi sistemlə,
Mingəçevir zonasında I mərhələdə 5 komanda 1 dövrədən ibarət dairəvi sistemlə,
Tovuz zonasında I mərhələdə 8 komanda 1 dövrədən ibarət dairəvi sistemlə,
Göygöl zonasında I mərhələdə 5 komanda 1 dövrədən ibarət dairəvi sistemlə qarşılaşacaqlar.
Naxçıvan zonasında keçirilən oyunlardan sonra final mərhələsində 1 komanda iştirak edəcək.
Bakı zonasında keçirilən oyunlar 2 mərhələdən ibarətdir. I mərhələ 26 komandanın iştirakı ilə, hər qrupda 13 komanda olmaq şərtilə A və B qruplarına bölünəcək və 1 (bir) dövrədən ibarət olacaq. A və B qruplarında son turun oyunlarından sonra ilk 6 pillədə qərarlaşan komandalar, növbəti mərhələdə A qrupu adlanacaq qrupda qərarlaşacaq. I mərhələdən sonra xallar sıfırlanacaq. II mərhələdə A qrupunda 12 komanda mübarizə aparacaq, oyunlar 1 dövrədən ibarət olacaq və son turun oyunlarından sonra ilk 6 yerdə qərarlaşan komandalar final mərhələsinə yüksələcəklər. I mərhələdə son turun oyunlarından sonra A və B qruplarında 7, 8, 9, 10, 11, 12 və 13-cü yerin sahibləri II mərhələdə B qrupu adlanacaq  qrupda qərarlaşacaq. B qrupunda  oyunlar 1 dövrədən ibarət  olacaq və komandalar mövsümün sonuna qədər mübarizə aparacaqlar.

II mərhələ
I mərhələnin qalibləri II seçmə mərhələyə vəsiqə qazanacaqlar:

•Sumqayıt və Siyəzən zonalarında keçiriləcək I mərhələdə müvafiq olaraq ilk 4 (dörd) yerin sahibləri, II mərhələdə 8 komanda, iki dövrədən ibarət dairəvi sistemlə qarşılaşır. Final mərhələsində ilk 3 (üç) yerin sahibi iştirak edəcək.
•Zaqatala və Mingəçevir zonalarında keçiriləcək I mərhələdə müvafiq olaraq ilk 3 (üç) yerin sahibləri, II mərhələdə 6 komanda iki dövrədən ibarət dairəvi sistemlə qarşılaşır.
•Tovuz və Göygöl zonalarında keçiriləcək I mərhələdə ilk 3 (üç) pillədə başa vuran komandalar, II mərhələdə 6 komanda iki dövrədən ibarət dairəvi sistemlə qarşılaşır.
•Ağcabədi, Saatlı və Ağsu zonalarında keçiriləcək I mərhələdə ilk 2 (iki) yerin sahibləri, II  mərhələdə 6 komanda iki dövrədən ibarət dairəvi sistemlə qarşılaşır.
•Biləsuvar və Lənkəran zonalarında keçiriləcək I mərhələdə müvafiq olaraq 3 (üç) yerin sahibləri, II mərhələdə 6 komanda iki dövrədən ibarət dairəvi sistemlə qarşılaşır.

III mərhələ
II mərhələnin qalibləri III mərhələyə vəsiqə qazanacaqlar:

•Zaqatala-Mingəçevir və Göygöl-Tovuz zonalarında II mərhələni ilk 3 (üç) pillədə başa vuran komandalar III mərhələdə birləşib 1 (bir) dövrədən ibarət dairəvi sistemlə qarşılaşır. Final mərhələsində ilk 3 (üç) yerin sahibi iştirak edəcək.
•Ağcabədi, Saatlı və Ağsu zonalarında II mərhələni ilk 3 (üç) pillədə başa vuran komandalar III mərhələdə Biləsuvar və Lənkəran zonasının ilk 3 (üç) pillədə başa vuran komandaları ilə birləşib 1 (bir) dövrədən ibarət dairəvi sistemlə qarşılaşır. Final mərhələsində ilk 3 (üç) yerin sahibi iştirak edəcək.
Final mərhələsi
Final mərhələsində 16 komanda olimpiya sistemi ilə qarşılaşır. Final mərhələsi 1/8, 1/4, 1/2, III yer uğrunda və final oyunundan ibarətdir. 1/2 final mərhələsində məğlub olan komandalar üçüncü yer uğrunda, qaliblər isə çempionluq uğrunda mübarizə aparır. Final mərhələsinin 1/8 final cütlükləri püşkatma yolu ilə müəyyən olunur.
Final mərhələsində oyunlar pley-off sistemi (ev və səfər oyunu) ilə keçirilir. Hər iki oyunun nəticələrinə görə vurulan və buraxılan qollar əsas vaxtda eyni sayda olarsa, o zaman hər hissəsi 13 dəqiqədən ibarət əlavə iki hissə oynanılır. Əgər oyunun əlavə hissələrində oyunun əsas hissəsinin nəticəsi dəyişməzsə, qalib penalti zərbələri ilə müyyənləşir (Hər komanda ilkin olaraq 5 zərbə vurmaq hüququna malikdir. Əgər 5 zərbədən sonra qalib müəyyənləşməzsə, penalti zərbələri qalib müəyyənləşənə qədər davam etdirilir).

Birbaşa final mərhələsinə vəsiqə qazanan komandalar:

Aşağıdakı cədvəldə birbaşa final mərhələsinə vəsiqə qazanan komandaların sayı göstərilib.

8.2 Bölgələr üzrə final mərhələsinə aşağıda göstərilmiş qaydaya uyğun olaraq 16 komanda vəsiqə qazanır.
8.3 AFFA U-14 Liqasında hər bölgə üzrə iştirak edəcək komandaların sayı, oyunların təşkili üçün seçilmiş mərkəz şəhərlər və oyunların keçirilmə sistemi aşağıda göstərilir:

 

Regionlar	Keçirilmə yeri	I mərhələ				Birbaşa final mərhələsinə çıxan komandalar	II mərhələyə çıxan komandaların sayı	Final mərhələsinə çıxan komandalrın sayı
		1-ci dövrə	2-ci dövrə	3-cü dövrə	4-cü dövrə
Mərkəz regionu	Ağsu
	Ağcabədi
	Saatlı
Cənub regionu	Biləsuvar
	Lənkəran
Şimal regionu	Sumqayıt
	Siyəzən
Şimal-Qərb regionu	Mingəçevir
	Zaqatala
Qərb regionu	Tovuz
	Gəncə
Naxçıvan regionu	Naxçıvan
Bakı regionu	Bakı

 

8.4Təqvimlər Liqaların Təşkili şöbəsi tərəfindən tərtib olunur.
8.5 II və III mərhələnin qaliblərinin müəyyən olunması:
a)Komandaların turnir cədvəlində tutduğu yerlər toplanmış xallara görə müəyyən olunur
b)Qələbəyə görə 3 (üç) xal, heç-heçəyə görə 1 (bir) xal verilir. Məğlubiyyətə görə isə xal verilmir.
c)Komandaların xalları bərabər olarsa, turnir cədvəlindəki sıralama aşağıdakı göstəricilərə görə müəyyən olunur:
•Komandaların öz aralarında keçirdikləri oyunların nəticələrinə əsasən;
•Komandaların öz aralarında keçirdikləri oyunlarda vurulmuş və buraxılmış qolların sayına əsasən;
•Bütün oyunlarda vurulmuş və buraxılmış qolların fərqinə görə;
•Bütün oyunlarda vurulmuş qolların sayına əsasən;
•Komandaların qələbə saylarına əsasən;
•Ən az qırmızı və sarı vərəqələrə görə toplanmış xalların fərqinə əsasən (sarı vərəqə 1
xal, qırmızı vərəqə 3 xal);
•Bütün göstəricilər eyni olarsa, yenidən komandalar arasında bir oyun keçirilir və nəticəyə əsasən turnir cədvəlində yer müəyyən edilir.

 

9.1 Oyunlar AFFA tərəfindən təsdiq edilmiş meydanlarda keçirilir.
9.2  Meydanda standartlara uyğun iki qapı olmalıdır.

10.Oyunun təşkili

10.1 AFFA U-14 Liqasının oyunları həftənin şənbə və ya bazar günləri keçirilir. İstisna hal kimi digər günlər AFFA-nın Liqaların Təşkili şöbəsi tərəfindən təyin oluna bilər.
10.2 AFFA-nın Liqaların Təşkili şöbəsi hər turdan öncə oyunların vaxtı ilə əlaqədar region nümayəndəsinə və yaxud komandanın əlaqələndirici şəxsinə məlumat verir.
10.3 Oyunun başlamasına 75 dəqiqə qalmış oyunun protokoluna nömrələri göstərilməklə oyunçuların adları, soyadları yazmalı və baş hakimin elektron poçt adresinə göndərilməlidir. Komandalar oyunun başlamasına ən azı 30 dəqiqə qalmış oyun keçirilən meydana gəlməlidirlər və oyundan öncə oyunçuların lisenziyaları baş hakimə təqdim etməlidir. Oyundan əvvəl lisenziyalar oyunun  hakiminə təqdim edilmədiyi halda hakim oyunu başlamamalıdır. Təqvimə uyğun olaraq adı birinci yerdə dayanan komanda ev sahibi hesab edilir.
10.4 Oyun başlayan vaxta klub və ya komanda meydançada olmazsa aldığı yol xərcinin 50% miqdarında cəzalandırılır. Təyin olunan vaxtdan sonrakı 20 dəqiqə ərzində komanda meydançada olmadığı təqdirdə pul cəzası 100%-ə çatdırılır və oyunun protokolu bağlanılır.
10.5 AFFA U-14 Liqasında əvvəlcədən AFFA tərəfindən müəyyənləşdirilmiş komandaların nəqliyyat xərcləri AFFA tərəfindən təmin olunur (Bakı zonasında çıxış edən komandalar, həmçinin peşəkar futbol klubları ilə bağlılığı olan komandalar nəqliyyat xərci ilə təmin olunmur).
10.6. AFFA yalnız müstəqil futbol məktəblərinin nəqliyyat xərclərini qarşılayır.
10.7 AFFA U-14 Liqasında mərkəzləşdirilmiş bölgələrdə keçirilən oyunların stadionunun icarə haqqı AFFA tərəfindən ödənilir.
10.8 Yalnız komanda tərkibində qeydiyyatdan keçirilmiş lisenziyası olan nümayəndələr (baş məşqçi, köməkçi məşqçilər, həkim, komanda administratoru və b.) və 11 oyunçunun ehtiyat skamyalarında əyləşməsinə icazə verilir.
10.9 Təcili Tibbi Yardım və ya həkim briqadası oyundan əvvəl meydançanın ərazisində olmalıdır. (Təcili Tibbi Yardım və ya həkim briqadası olmadan baş hakim oyunu başlaya bilməz).

11.Oyun qaydaları

11.1 Bütün oyunlar FİFA oyun qaydalarına əsasən keçirilir.
11.2 Liqada yaşı 14-dək olan oyunçular iştirak edə bilər (təvəllüdü 01.01.2012-ci ildən başlayanlar və maksimum iki il aşağı təvəllüdlü). 
11.3 2025/2026-cı illər mövsümündə AFFA tərəfindən keçirilən bütün liqalarda eyni klubun tərkibinə cəlb olunmuş oyunçu mövcud lisenziyanı təqdim etdikdə, digər liqalarda yaş həddini keçməmək şərti ilə oynaya bilər.
11.4 Oyunçunun müəyyən liqada aldığı cəza digər liqaya şamil olunmur. 
11.5 Oyunlar iki hissədən ibarətdir. Hər hissə 40 dəqiqə, hissələrarası fasilə isə 10 dəqiqədir.
11.6 Oyunlarda əvəzetmə oyunun protokolunda adları göstərilmiş futbolçularla həyata keçirilir. Əvvəlcə protokolu meydan sahibi olan komanda doldurur. Oyunun protokoluna 22 oyunçunun (11 əsas, 11 ehtiyat) adı və soyadı yazılır.
11.7 Yalnız  6 rəsmi şəxs və 11 oyunçunun ehtiyat skamyalarında əyləşməsinə icazə verilir.
11.8 Meydanda hər hansı tütün məmulatlarından və elektron siqaretdən istifadə etmək qadağandır.

 

12.1 Oyunlarda əvəzetmə oyunun protokolunda adları göstərilmiş futbolçularla həyata keçirilir. Oyun ərzində hər komanda 7 əvəzetmədən istifadə edə bilər. Əvəzetmə üçün oyun 4 dəfə dayandırıla bilər. Pley-off mərhələsinin hər 2 oyununun və final oyununun əsas vaxtında ümumi hesab bərabər olarsa, bu zaman hər hissəsi 13 dəqiqədən ibarət əlavə 2 hissə oynanılır. Belə olan halda hər komanda əlavə olaraq 1 dəfə oyunu saxlamaq və 1 nəfər oyunçunu əvəzləmək hüququna malik olur (hissələrarası fasilədə edilən əvəzetmə bu saya daxil deyildir). Əvəzlənmiş oyunçu sonradan meydana daxil ola bilməz. 
12.2 Meydana daxil olmağa hazırlaşan oyunçu yan hakimə lisenziya ilə yaxınlaşmalıdır.
12.3 Oyun ərzində ehtiyat oyunçular isinmə hərəkətlərini etmək üçün texniki zonanı tərk edə bilər. 12.4 Oyunun baş hakimi oyundan öncə isinmə hərəkətləri üçün təyin olunmuş yerləri komandalara göstərir. İsinmə hərəkətlərini 7 oyunçu eyni anda edə bilər.

 

13.1 Komandalar oyundan ən azı 75 dəqiqə öncə elektron protokolu oyunun baş hakiminin elektron poçt ünvanına göndərməlidir.
13.2 Protokolda  oyunçunun  adı, soyadı, təvəllüdü və formasında əks olunmuş nömrəsi göstərilməlidir. Həmçinin oyun zamanı ehtiyat skamyada oturan rəsmi şəxslərin adı, soyadı və vəzifəsi yazılmalıdır. Oyun protokolu hər iki komandanın rəsmi şəxsləri tərəfindən imzalanmalıdır.
13.3 İlk 11-lik kimi protokolda göstərilən oyunçular oyuna başlayır. Digər 11 oyunçu ehtiyat skamyasında əyləşir. Oyunçuların futbol formalarında göstərilən nömrələr protokoldakı nömrələrlə uyğun gəlməlidir.
13.4 Komandalar oyundan ən azı 15 dəqiqə öncə protokolu baş hakimə təqdim etməlidirlər.
13.5 Oyundan əvvəl lisenziyalar  hakimlərə təqdim edilmədiyi halda baş hakim oyunu başlamamalıdır.
13.6 Hakimlər briqadası oyundan öncə protokolda göstərilən bütün şəxslərin lisenziyasını yoxlayır. 13.7 Yarışda iştirak edən komandanın hər bir üzvü AFFA tərəfindən tərtib olunmuş lisenziyaya malik olmalıdır. Lisenziyada aşağıdakılar əks olunur:
•Lisenziyanın nömrəsi;
•Komandanın adı;
•Şəxsin adı, soyadı,
•Atasının adı;
•Fotoşəkil;
•Təvəllüdü;
13.8 Əgər oyunun protokolu tələb olunan vaxtda hakimlərə təqdim olunmazsa bu məsələyə AFFA-nın İntizam Komitəsi tərəfindən baxılacaqdır.
13.9 Yalnız ehtiyat oyunçu kimi göstərilən 11 nəfərdən 7-si oyun zamanı meydana daxil ola bilər. Oyun zamanı əvəzlənmiş oyunçu meydana bir daha qayıda bilməz.
13.10 Oyunun baş tutması üçün komandalar meydanda tam heyətlə olmalıdırlar. Əks halda oyun baş tutmamış sayılır, komanda üçün nəzərdə tutulan yol xərcinin 100% miqdarında cəzalandırılır  və oyunun protokolu bağlanılır.

 

14.1 Hər iki komanda tərəfindən elektron variantda  oyun protokolu hakimə təqdim olunduqdan sonra oyunçuların adlarının protokolda dəyişilməsi qadağandır. İstisna hallar aşağıdakılardır:
•Əgər ilk 11-likdə göstərilən hər hansı oyunçunun oyundan öncə fiziki durumu ilə bağlı problem aşkarlanarsa, o zaman 11 ehtiyat oyunçudan biri ilk 11-liyə daxil oluna bilər. Bu halda oyun ərzində komandanın 7 əvəzetmə ehtiyatı öncədən göstərildiyi kimi qüvvədə qalır.
•Əgər oyun protokolunda göstərilən 11 ehtiyat oyunçudan hər hansı birinin fiziki durumu ilə bağlı problem aşkarlanarsa, o zaman protokolda göstərilməyən, lakin lisenziyası olan digər bir oyunçu ilə əvəzlənə bilər.

 

15.1 Əgər komanda oyunda iştirak etməkdən imtina edərsə, AFFA-nın İntizam Komitəsi tərəfindən texniki məğlubiyyət verilir.
15.2 Komanda oyuna çıxmaqdan imtina etdikdə, həmçinin yetərsay və təyin edilən vaxtda meydanda olmadıqda, bu hal 3 dəfə baş verdikdə, AFFA-nın İntizam Komitəsinin qərarına əsasən turnirdən kənarlaşdırılacaqdır.
15.3 Liqadan hər hansı bir səbəbə görə kənarlaşdırılan komanda növbəti mövsüm liqaya buraxılmaya bilər.
15.4 Əgər oyun başladıqdan sonra hər hansı bir səbəbə görə dayandırılarsa, AFFA-nın Liqaların Təşkili şöbəsi klublar və ya komandalarla razılaşdırdıqdan sonra oyunu başqa tarixə keçirə bilər.Oyun dayandırıldığı vaxtdan və həmin ana qədər olan nəticə ilə davam etdiriləcəkdir.

 

16.1 AFFA U-14 Liqasının oyunlarını AFFA-nın Hakimlər Komitəsi tərəfindən təyin edilmiş hakimlər idarə edir və hakimlik FİFA qaydaları əsasında həyata keçirilir. Hakimlər Komitəsi AFFA U-14 Liqasının oyunlarına 3 nəfərdən ibarət hakimlər briqadası təyin edir (1 baş hakim, 2 yan xətt hakimi).
16.2 Hakimlər briqadası oyunun başlanmasından 60 dəqiqə öncə gəlib, meydançanın oyuna hazırlıq vəziyyətini yoxlamalıdırlar.
16.3 Protokollar oyundan sonra 12 saat ərzində LTŞ-yə təqdim olunmalıdır.
16.4 Baş hakim oyunun protokoluna adı daxil edilmiş oyunçuların sənədlərini mütləq yoxlamalıdır. Oyuna cəlb edilmiş oyunçuların və iştirakçıların lisenziyaları zərurət olduqda oyunun sonunadək baş hakimdə qala bilər.
16.5 Komandalar tərəfindən hakimlərin dəyişdirilməsi ilə əlaqədar xahiş qəbul olunmur.
16.6. Hakimlərin oyunla əlaqəli hər hansı bir fakt və onun nəticəsi ilə bağlı qərarı, o cümlədən, qol vurulması və ya vurulmamasını saymaqla bağlı qərarı qətidir.

 

17.1 Bütün qırmızı vərəqələrə, oyun zamanı və oyundan sonra baş verən insidentlərlə bağlı məsələlərə AFFA-nın İntizam Komitəsi tərəfindən baxılır və onun tərəfindən müvafiq qərarlar qəbul edilir. 
17.2 Oyunçular AFFA-nın İntizam Komitəsinin qərarları əsasında cəzalandırılır.

18.Sarı və qırmızı vərəqələr

18.1 Sarı və qırmızı vərəqələrə görə məsuliyyəti komanda və ya klub daşıyır.
18.2 Qırmızı vərəqə alan oyunçu AFFA-nın İntizam Komitəsinin çıxaracağı qərara uyğun olaraq, komandanın keçirəcəyi müəyyən olunmuş sayda növbəti oyunu (oyunları) buraxır.
18.3 Cari mövsüm ərzində mərhələdən asılı olmayaraq, dörd sarı vərəqə alan oyunçu növbəti turu buraxmalıdır.
18.4 Sarı vərəqələr mərhələdən asılı olmayaraq öz qüvvəsində qalır.
18.5 Liqanın hər hansı mərhələsində alınmış qırmızı vərəqələr öz qüvvəsində qalır.
18.6 Baş tutmayan oyundan sonra AFFA-nın İntizam Komitəsi tərəfindən texniki məğlubiyyət alan komandanın həmin oyunu buraxmalı olan oyunçularının cəzaları qüvvədə qalır.
18.7 Baş tutmayan oyundan sonra AFFA-nın İntizam Komitəsi tərəfindən texniki qələbə alan komandanın həmin oyunu buraxmalı olan oyunçuları cəza çəkmiş hesab olunur.
18.8 Oyunçu qırmızı vərəqə alıbsa və AFFA-nın İntizam Komitəsi növbəti oyuna qədər bu barədə qərar çıxarmayıbsa, həmin oyunçu qərar çıxana qədər oyunları buraxmalıdır.
18.9 Sarı və qırmızı vərəqələrə görə öhdəlik klubun üzərinə düşür (turu buraxmalı olan oyunçu oyunda iştirak edərsə məsuliyyəti komanda daşıyır).

 

19.1 Protest verən baş məşqçi oyundan dərhal sonra bu barədə baş hakimi xəbərdar etməlidir. Protestin verilməsi oyunun protokolunda öz əksini tapmalıdır. Oyunun gedişində ciddi münaqişələr baş verərsə, oyunun baş hakimi, yan xətt hakimləri AFFA-nın Liqaların Təşkili şöbəsinə öz izahatlarını göndərməlidirlər. Protest komandanın baş məşqçisi tərəfindən imzalanmalı, 24 saat ərzində AFFA-nın Liqaların Təşkili şöbəsinə çatdırılmalıdır.
19.2 Protestlərə aşağıdakı hallarda baxılmır:
•11 metrlik cərimə zərbələrinin təyin olunub-olunmaması;
•Oyundankənar (off-side) vəziyyətin müəyyən edilməsi barədə;
•Topun qapı xəttini keçib-keçməməsi barədə;
19.3 AFFA-nın Oyunçuların Statusu və Transferi haqqında Əsasnaməyə əsasən AFFA-nın Oyunçuların Statusu və Transferi Komitəsinin qərarlarından bu qərar alındığı gündən 15 (on beş) gün ərzində AFFA-nın Apellyasiya Arbitraj Tribunalına apellyasiya şikayəti verilə bilər. Apellyasiya Arbitraj Tribunalının qərarı yekun qərardır.

 

20.1 Liqada ilk 3 yeri tutan komandaların oyunçuları və baş məşqçiləri müvafiq olaraq qızıl, gümüş və bürünc medallarla və AFFA-nın diplomları ilə təltif olunur.
20.2 Mövsümün sonunda liqanın ən məhsuldar oyunçusu, ən yaxşı oyunçusu, ən yaxşı qapıçısı seçilir və AFFA tərəfindən mükafatlandırılır.

21.Mətbuat

21.1 Oyundan sonra müraciət olunduqda hər hansı oyunçu, məşqçi və klub rəsmisindən mətbuat nümayəndələri müsahibə almaq hüququna malikdirlər.

 

22.1 Mövsüm ərzində AFFA tərəfindən stadionlar aşağıdakı bəndlər üzrə təmin olunur:
•Top №5 (təsdiq edilmiş sayda);
•Qapı toru;
•Oyun gödəkçələri (jilet);
•İcarə haqqı;
22.2 Mövsüm ərzində AFFA tərəfindən müəyyən olunmuş komandaların nəqliyyat xərcləri (təsdiq edilmiş məbləğdə) təmin olunur.

 

23.1 Meydanda reklam lövhələrinin (1 ədəd) yerləşdirilməsi aşağıdakı sxemdə göstərildiyi kimi olmalıdır.