Misli Premyer Liqasının 2023/2024-cü illər mövsümünə yekun vurulub.
“Azərsun Arena”da keçirilmiş sonuncu – XXXVI turun “Araz-Naxçıvan” – “Qarabağ” (2:2) oyunundan sonra mükafatlandırma mərasimi təşkil olunub. İlk olaraq Azərbaycan çempionatının sponsoru “Misli” ASC-nin baş direktoru Osman Karakuşa xüsusi hədiyyə təqdim edilib.
Ardından mövsümün qalibi olan “Qarabağ” komandası qızıl medallar və kubokla mükafatlandırılıb. Həmçinin 20 qolla mövsümün ən məhsuldar oyunusu olan “Qarabağ” klubunun hücumçusu Olavio Juninyo xüsusi mükafata layiq görülüb.
Mükafatlandırma mərasimində AFFA-nın prezidenti Rövşən Nəcəf, icraçı vitse-prezidenti Sərxan Hacıyev, Peşəkar Futbol Liqasının texniki-idman direktoru Elgiz Abbasov iştirak ediblər. Mərasimin sonunda “Qarabağ” komandasına çempionluq kuboku AFFA-nın prezidenti Rövşən Nəcəf tərəfindən təqdim olunub.
