Azərbaycanın UEFA Çempionlar Liqasındakı təmsilçisi “Sabah” II təsnifat mərhələsində cavab oyununa çıxıb. Bakı klubu Finlandiyanın “KuPS” komandasının qonağı olub.
Bakıda baş tutan ilk oyunda 1:0 hesablı qələbə qazanan “Sabah” Kuopio Mərkəzi Stadionundakı görüşdə də rəqibini məğlub edib. Valdas Dambrauskasın yetirmələri 2:0 hesablı qalibiyyət əldə ediblər. Təmsilçimizin heyətində qolları 53-cü dəqiqədə Velko Şimiç və 70-ci dəqiqədə Coy Lens Mikels vurub.
Beləliklə, “Sabah” III təsnifat mərhələsinə adlamaqla yanaşı, UEFA Konfrans Liqasının Liqa mərhələsinə vəsiqəni rəsmiləşdirib. Azərbaycan çempionunun III raunddakı rəqibi “Lex” (Polşa) – “Orxus” (Danimarka) cütünün qalibi olacaq. Komandaların Danimarkadakı ilk matçında “Lex” 4:1 hesablı qələbə qazanıb.
Qeyd edək ki, Çempionlar Liqasında növbəti mərhələnin oyunları avqustun 4-5-də və 11-də keçiriləcək.
