“Futbolçularımızın istəkli olması mənə ümid verir”

Konfransda DÇ-2026-nın seçmə mərhələsi çərçivəsində İslandiya və Ukrayna yığmalarına qarşı keçiriləcək oyunların heyətini açıqlayan portuqaliyalı mütəxəssis media nümayəndələrinin suallarını cavablandırıb.

O, əvvəlcə UEFA Çempionlar Liqasında Liqa mərhələsinə yüksələn “Qarabağ” klubunu təbrik edib: “İlk növbədə “Qarabağ”ı Çempionlar Liqasının Liqa mərhələsinə vəsiqə qazanması münasibətilə təbrik edirəm. Bu, çox vacib nəticə, Azərbaycan üçün böyük uğurdur. Başda Qurban Qurbanov olmaqla “Qarabağ”ın bütün oyunçularını təbrik edirəm. Avropada bir müddət hamı Azərbaycan və “Qarabağ” haqqında danışacaq. Komanda Liqa mərhələsinə yüksəlməyə layiq idi. Orada da Azərbaycanı layiqli şəkildə təmsil etmək üçün əllərindən gələni edəcəklərinə əminəm”.

Baş məşqçi heyətə dəvət olunan futbolçuların oyun praktikasının olmasının vacibliyini vurğulayıb: “Baş məşqçi kimi bütün futbolçuların oyun praktikasının olmasını istərdim. Heyətə çağırılan futbolçularla hazırlaşmağa və uğurlu nəticələr əldə etməyə çalışacağıq. Oyunları izləyir, futbolçuların çıxışını daim təhlil edirik. Son yoldaşlıq görüşləri və ondan əvvəlki toplanışlara əsasən deyə bilərəm ki, futbolçular çox istəklidirlər, yaxşı nəticə əldə etməyə çalışırlar. Bu da mənə ümid verir. İnanıram ki, eyni istək və eyni tempdə davam edəcəklər. İstər mən, istər oyunçular, istərsə də Azərbaycan xalqı qələbə arzulayır”.

Fernandu Santuş seçmə mərhələnin ilk iki turunda qarşılaşacağımız rəqiblər barədə də fikirlərini bildirib: “Bizi qarşıda heç də asan oyunlar gözləmir. İslandiya millisində eyni futbolçular uzun müddətdir bir yerdə çıxış edirlər. Demək olar ki, heyətlərindəki bütün oyunçular ölkə xaricində çıxış edirlər. Çox təcrübəli və keyfiyyətli heyətləri var, intensiv komandadır. Müdafiədən hücumlar qurmağı yaxşı bacarırlar. Topsuz olduqda isə aqressivlik göstərir, topu dərhal ələ keçirməyə çalışırlar. Köməkçilərimlə bir yerdə İslandiyanın bir çox oyununa baxmışıq. Hansı oyun üslubuna malik olduqlarını, güclü və zəif cəhətlərini bilirik. Komandamızı bu matça yaxşı hazırlayacağıq. Çox yaxşı oyun olacaq. İslandiyaya uzun səfərimiz olacaq, 4 saat fərq var. Uyğunlaşma prosesini daha yaxşı keçirmək üçün İslandiyaya bir qədər tez gedəcəyik.

Ukrayna millisi də çox güclü komandadır. Hücumameyilli heyətlə çıxış edirlər. Bizim üzərimizə düşən iş hər iki rəqibi yaxşı təhlil etmək, zəif və güclü tərəflərini futbolçulara çatdırmaqdır. Ukrayna ilə ev matçında azarkeşlərimizin dəstəyinə güvənirik. Rəqiblərin gücündən asılı olmayaraq, hər oyuna yalnız qələbə qazanmaq üçün çıxacağıq”.

Qeyd edək ki, Azərbaycan millisi sentyabrın 5-də Reykyavikdə İslandiya yığması ilə, sentyabrın 9-da isə Bakıda Ukrayna seçməsi ilə qarşılaşacaq.